မဟာမုနိ ဘုရားကြီးဂေါပကအဖွဲ့ကတောင် လိုက်မေးပြီး အလျော်ပေးခဲ့ရတဲ့အထိ ကြိတ်ကြိတ်တိုးခဲ့တဲ့ အမေစုရဲ့ ဘုရားဖူးခရီးစဉ်လေ။ ၂၀၁၈ ဩဂုတ် ၁၂ ရက်နေ့တုန်းက နိုင်ငံတော်၏အတိုင်ပင်ခံပုဂ္ဂိုလ် အမေ ဒေါ်အောင်ဆန်းစုကြည်ဟာ မန္တလေး မဟာမုနိရုပ်ရှင်တော်မြတ်ကြီးကို သွားရောက်ဖူးမြှော် ကြည်ညိုခဲ့ပါတယ်။ အမေစု လာဖူးမယ်ဆိုတဲ့ သတင်း ပျံ့သွားတဲ့နောက်မှာတော့ မဟာမုနိရင်ပြင်တခုလုံး လူပင်လယ်ဖွေးဖွေးလှုပ်သွားပါတော့တယ်။ အလုအယက် လာရောက် နှုတ်ဆက်ကြတဲ့ ပြည်သူတွေ သိပ်များတော့ အချင်းချင်းတိုးဝှေ့မိကြပြီး အရှေ့ဘက်စောင်းတန်းက နိဗ္ဗာန်ကုန်အရောင်းဆိုင်နှစ်ဆိုင်မှာ တင်ထားတဲ့ ကုန်ပစ္စည်းတချို့ ပျက်စီးဆုံးရှုံးခဲ့ရတဲ့အထိပါပဲ။ ဆိုင်ခန်းနှစ်ခန်းရှေ့မှာ ခင်းကျင်းထားတဲ့ နိဗ္ဗာန်ကုန်ပစ္စည်းတချို့နဲ့ မှန်ချပ်နှစ်ချပ် ကျကွဲတဲ့အသံကို အမေ ဒေါ်အောင်ဆန်းစုကြည်ကလည်း ကြားတဲ့အတွက် ပျက်စီးဆုံးရှုံးမှုတွေ ရှိခဲ့ရင် သူ့အနေနဲ့ ပြန်လျော်ပေးပါ့မယ်ဆိုတဲ့အကြောင်း ပြောခဲ့ပါတယ်။ အမေစု၊ ဆရာဇော်နဲ့ အဖွဲ့တွေ နေ့လည်ပိုင်း မန္တလေးတက္ကသိုလ်ထဲက စကားဝိုင်းအပြီး မန္တလေးမြို့ထဲက လက်ဖက်ရည်ဆိုင်မှာ နေ့လည်စာစားကြတော့ အမေစုက သူ့ကြောင့် အခုလိုမျိုး နစ်နာပျက်စီးတဲ့အပေါ် ဆိုင်ရှင်တွေ အတွက် စိတ်မကောင်းဖြစ်မိတဲ့အကြောင်း ဆရာဇော်က ပြောပေးပါလို့ မှာခဲ့ပါတယ်။ အမေစု ခရီးစဉ်အပြီး နောက်ရက်မှာတော့ ဆရာဇော်က ဂေါပကအဖွဲ့ကို ချိတ်ဆက်အကြောင်းကြားခဲ့ပြီး ဂေါပကအဖွဲ့က အရှေ့ဘက်စောင်းတန်းက ဆိုင်ခန်းရှင်တွေ ပျက်စီးမှုများရှိ၊ မရှိ တစ်ဆိုင်ချင်း လိုက်လံမေးမြန်းခဲ့ပါတယ်။ မှန်နှစ်ချပ်၊ သပိတ်အသေးနှစ်လုံးနဲ့ ဥာဏ်တော်နှစ်လက်မခွဲရှိ ဆင်းတုတော်သုံးဆူတို့အတွက် ကာလတန်ဖိုးအတိုင်း ပေးလျော်ခဲ့ပါတယ်။ ဆိုင်ရှင်တွေက အမေလာတာကိုပဲ အတိုင်းမသိအောင် ဝမ်းသာပျော်ရွှင်ကြောင်းနဲ့ လျော်ကြေးငွေ လက်မခံလိုကြောင်း တောင်းဆိုခဲ့ကြပါတယ်။ " လူတွေက အမေ့ကို ချစ်ခင်နှုတ်ဆက် ချင်ကြလို့ တိုးကြတာဆိုတော့ ဖြစ်သွားတဲ့အပေါ်မှာ နားလည်ပေးနိုင်ပါတယ်။ ဂေါပကအဖွဲ့ကနိုင်ငံတော်အတိုင်ပင်ခံပုဂ္ဂိုလ် မှာကြားသွားတဲ့အတိုင်း မဖြစ်မနေလုပ်ပေးရမယ်ဆိုလို့သာ ပစ္စည်းလျော်ကြေးငွေကို လက်ခံလိုက်ရတာပါ" တဲ့။ အမေစု ကျန်းမာပါစေ ❤️❤️❤️ ပြည်သူတွေကို နွေးထွေးစေတဲ့ ခေါင်းဆောင်၊ မျက်နှာ မငယ်ရစေတဲ့ ခေါင်းဆောင် အမေစု ကျန်းမာပါစေ။ ပြည်သူတွေလည်း နေ့စဉ်နဲ့အမျှ ကြုံနေရတဲ့ ဘေးဒုက္ခပေါင်းစုံကနေ အမြန်ကင်းလွတ်ကြရပါစေ။ crd — @nld052 TikTok