ပုသိမ်မြို့ရှိ LonKan Hotel တွင် မူးယစ်ဆေးဝါးနှင့် အရက်သောက်စားပြီးရိုက်ပွဲများမကြာခဏဖြစ်ပွားနေလို့ဒေသခံတွေအထိတ်တလန့်ဖြစ်နေကြရ ဇန်နဝါရီ ၊၂၆ ရက် The Justice Wave ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့နယ်၊ ပုသိမ်မြို့ မဟာဗန္ဓုလလမ်းပေါ်ရှိ ချစ်ပိုင်စိုး ဦးဆောင်ဖွင့်လှစ်နေသော LonKan Hotel တွင် မူးယစ်ဆေးဝါးသုံးစွဲခြင်း၊ KTV၊ မာဆတ်၊ Bar လုပ်ငန်းများ ဖွင့်လှစ်လုပ်ကိုင်ကာ အကြမ်းဖက်မှုများ၊ ရန်ပွဲများ မကြာခဏ ဖြစ်ပွားနေကြောင်း ဒေသခံပြည်သူများက ပြောကြားသည်။ အဆိုပါ Hotel တွင် စစ်ကောင်စီနှင့် ရဲတပ်ဖွဲ့အကြီးပိုင်းများပါ လာရောက် သောက်စားမူးယစ်နေကြသဖြင့် ပတ်ဝန်းကျင်အတွင်း လုံခြုံရေးအခြေအနေ မကောင်းမွန်လာကြောင်းလည်း ဒေသခံများက ဆိုသည်။ ယင်းသို့ မူးယစ်ဆေးဝါးနှင့် အရက်သောက်စားမှုများကြောင့် ပတ်ဝန်းကျင်ကို ဒုက္ခပေးနေသည့် ဖြစ်စဉ်ကို ဇန်နဝါရီလ ၁၅ ရက်နေ့က သတင်းအဖြစ် ဖော်ပြခဲ့ပြီးနောက် ဇန်နဝါရီလ ၁၇ ရက် ည ၉ နာရီ ၃၀ မိနစ်ခန့်တွင် ရဲတပ်ဖွဲ့မှ မြို့နယ်မှူး ကြည်လွင်၊ မြို့နယ်အုပ်ချုပ်ရေးမှ အောင်ကျော်ဦး၊ ၎င်း၏ လက်ထောက်ဟုဆိုသူ ထွန်းလင်းအောင်နှင့် နယ်ထိန်းအဖွဲ့တို့ လာရောက် စစ်ဆေးခဲ့ကြောင်း သိရသည်။ သို့သော် ယင်းစစ်ဆေးမှုသည် ဟန်ပြစစ်ဆေးမှုသာဖြစ်ပြီး ငွေကြေးလာဘ်လာဘယူကာ ပြန်လည်ထွက်ခွာသွားကြောင်း ဒေသခံများက စွပ်စွဲပြောဆိုသည်။ ထိုနောက်ပိုင်းတွင် LonKan Hotel အနေဖြင့် ယခင်အတိုင်း မူးယစ်ဆေးဝါးရောင်းချမှု၊ အရက်သေစာနှင့် မူးယစ်ဆေးဝါးသုံးစွဲမှုများ ဆက်လက်ပြုလုပ်နေပြီး နေ့စဉ်လိုလို ရန်ပွဲများ ဖြစ်ပွားနေဆဲဖြစ်ကြောင်း သိရသည်။ ထို့အပြင် နေ့စဉ် ည ၈ နာရီခန့်မှ စတင်၍ DJ အသံများ အလွန်ကျယ်လောင်စွာ ဖွင့်လှစ်သဖြင့် အနီးအနားရှိ ရွှေဝတ်မှုန် လွှတ်တော်ရုံးအထိ ကြားနေရပြီး ပတ်ဝန်းကျင်အိမ်များ တုန်ခါသည့်အထိ ဖြစ်ပေါ်နေကြောင်း ဒေသခံများက ပြောကြားသည်။ ယင်းအသံများကြောင့် သက်ကြီးရွယ်အိုများ အဆင်မပြေဖြစ်နေသည့်အပြင် Hotel အနီးရှိ ဘုန်းကြီးကျောင်းမှ ကိုယ်တော်များလည်း တရားထိုင်ရန် စိတ်အေးချမ်းမှု မရရှိဘဲ သာသနာရေးရာတွင် အနှောင့်အယှက်များ ဖြစ်ပေါ်နေကြောင်း သိရသည်။ ဒေသခံပြည်သူများက ရပ်ကွက်အုပ်ချုပ်ရေးမှူးထံ အကြိမ်ကြိမ် တိုင်ကြားခဲ့သော်လည်း ၎င်းအနေဖြင့် “အသံမဆူရန် Hotel ကို မကြာခဏ သွားပြောနေရတာ မောလှပြီဖြစ်ပြီး အထက်ပိုင်းက အရေးယူခြင်း မရှိသဖြင့် မတတ်နိုင်ကြောင်း” ပြန်လည်တောင်းပန်ပြောဆိုခဲ့ကြောင်းလည်း သိရသည်။ ဒေသခံများအဆိုအရ တိုင်းအစိုးရအဖွဲ့၊ မြို့နယ်အုပ်ချုပ်ရေးအဖွဲ့နှင့် ရဲတပ်ဖွဲ့တို့၏ အကျင့်ပျက်ခြစားမှုနှင့် တာဝန်ပေါ့လျော့မှုကြောင့် ပြည်သူများအနေဖြင့် စိတ်ပျက်နေကြပြီး ဥပဒေကို ငွေရှိသူများက စိတ်ကြိုက် လိုက်နာခြင်း၊ မလိုက်နာခြင်း ပြုလုပ်နိုင်သည့် အခြေအနေ ဖြစ်ပေါ်နေကြောင်း ပြောကြားနေကြသည်။ #thejusticewave #ပုသိမ် Write to The Justice Wave — TikTok di @the.justice.wave