အမေစုနဲ့ ဆံရစ်ဝိုင်း ယောင်ပေစူးများ နိုင်ငံတော်၏အတိုင်ပင်ခံပုဂ္ဂိုလ် အမေ ဒေါ်အောင်ဆန်းစုကြည်ဟာ ၂၀၁၉ ဇွန် ၂၇ ရက်နေ့မှာ မကွေးတိုင်းဒေသကြီး၊ ပွင့်ဖြူမြို့နယ်၊ ရေပုတ်ကြီးကျေးရွာကို ရောက်ရှိလာပါတယ်။ ဒီခရီးစဉ်က အားလုံး သဘောကျခဲ့ရတဲ့ ဆံရစ်ဝိုင်းနဲ့ ယောင်ပေစူး လူငယ်လေးတွေရဲ့ ရွာဖြစ်ပါတယ်။ အမေစုက " ကဲ ဘယ်သူမှ ဘာမှ မမေးခင် ကျမက အရင်မေးမယ်။ ရေပုတ်ကြီးရွာက ကလေးတွေက စတုတ္ထတန်းအထိပဲ ပညာသင်ကြားနေကြတယ်လို့ ကြားတယ်နော်။ ဘာဖြစ်လို့လဲ။ ပညာရေးဆုံးခန်းတိုင် သင်ကြားနိုင်ဖို့ ဘာအခက်အခဲတွေ ရှိနေလဲ။ ကျမတို့ကို ပြောပါ။ မိဘတွေအနေနဲ့လည်း ကလေးတွေကို ရေးတတ် ဖတ်တတ်ရုံပဲ လုံလောက်ပြီလို့ သဘောထားလို့ မရပါဘူး။ ကျမတို့ ကလေးတွေရဲ့ ပညာရေးကို မြှင့်တင်ပေးကြပါ " လို့ မှာကြားခဲ့ပါတယ်။ နိုင်ငံတော်၏အတိုင်ပင်ခံပုဂ္ဂိုလ် အမေ ဒေါ်အောင်ဆန်းစုကြည်ဟာ ရွာခံတွေမေးတဲ့ သောင်းပြောင်းထွေလာကို ဆရာဒေါက်တာအောင်မိုးညိုနဲ့အတူ ဖြေကြားခဲ့ပြီး တွေ့ဆုံပွဲကို တက်ရောက်လာတဲ့ ဆံရစ်ဝိုင်း၊ ယောင်ပေစူးလူငယ်တွေနဲ့ မှတ်တမ်းတင်ဓာတ်ပုံရိုက်ခဲ့ပါတယ်။ လူအများ ကြည်နူးခဲ့ရတဲ့ ပုံလေးနဲ့ တွဲတင်ပေးလိုက်ပါတယ်။ ရေပုတ်ကြီးကျေးရွာကို ဆံရစ်ဝိုင်းတို့ရွာလို့ ဒေသတွင်းမှာ ခေါ်ဆိုတာပါ။ ကျေးရွာရဲ့ ဆံရစ်ဝိုင်းယဉ်ကျေးမှုဟာ ကျေးရွာစတင်ပေါ်ပေါက်စဉ်ကတည်းက ဖြစ်တည်ခဲ့ခြင်းဖြစ်ပါတယ်။ ကျေးရွာသူ ကျေးရွာသားတွေဟာ မွေးကင်းစကနေ ၅ လထိ ဆံပင်ကို ဦးဇင်းမှုတ်၊ ၅ လမှ ၄ နှစ်ထိကို ကြက်တောင်စီး၊ ၅ နှစ်မှ ၁၄ နှစ်ထိကို ဆံရစ်ဝိုင်း၊ ၁၅ နှစ်မှ ၁၆ နှစ်ကို ဆံထောက်၊ ၁၇ နှစ် မှ ၁၇ နှစ်အထက်ကို ဆံထောက်ကောက်ဆိုပြီး ဆံပင်ပုံစံ သတ်မှတ်ထားကြပါတယ်။ အမျိုးသားအများစုကတော့ ရှင်ပြုပြီးကာလမှာ ဆံရစ်ဝိုင်းမထားကြတော့ပါဘူး။ အမျိုးသမီးတွေကလည်း အိမ်ထောင်ပြုပြီးကာလမှာ အုပ်လုံးသိမ်းပြီး ဆံပင်ရှည်ထားကြတာပါ။ အိမ်ထောင်မပြုသူတွေအနေနဲ့လည်း အသက် ၃၀ အထက်ဆိုရင် ဆံထောက်မထားကြတော့ပဲ အုပ်လုံးသိမ်း ဆံပင်ရှည်ထားကြတာ ဖြစ်ပါတယ်။ နိုင်ငံတော်၏အတိုင်ပင်ခံပုဂ္ဂိုလ် အမေစုက " ဒီလို ရွာမျိုးဆိုတာ ဒေသအခြေပြုခရီးသွားလာရေးဖော်ဆောင်ဖို့ သိပ်ကို အလားအလာ ရှိပါတယ်။ ဒါက သေချာပေါက် အောင်မြင်နိုင်ပါတယ်။ ဒါပေမဲ့ ပြည်တွင်းပြည်ပ ခရီးသွားလာမှုကို ဖန်တီးဖို့ဆိုရင် ဒေသခံတွေက လက်သင့်ခံနိုင်ဖို့ လိုတယ်။ ပြီးတော့ ကလေးတွေကလည်း အတန်းပညာတွေကို တတ်မြောက်ထားမှ ကိုယ့်ဒေသကို အခြေပြုလာမဲ့ စီးပွါးရေးနဲ့ ဖွံ့ဖြိုးရေးအခွင့်အလမ်းတွေကို လိုက်လျောညီထွေ ဖမ်းဆုပ်နိုင်မယ်။ ကိုယ်က ကိုယ့်ဒေသရဲ့ တိုးတက်ရေးကို ဦးဆောင်မောင်းနှင်နိုင်တဲ့ အနေအထားဖြစ်ရမယ်။ သူများက လာပြီး လုပ်လို့ ကိုယ်က တကောက်ကောက်ပါသွားတာမျိုးက ရေရှည်မှာ အဆင်မပြေနိုင်ဘူး။ အဲတာကြောင့် ကျမက ကလေးတွေကို ပညာရေးဆုံးခန်းတိုင်အောင် လုပ်ပေးကြဖို့ ပြောတာပါ။ ကျမတို့ကလည်း ကူမယ်။ မိဘတွေကလည်း အားပေးပါ " လို့ မှာကြားခဲ့ပါတယ်။ အမေစု ကျန်းမာပါစေ ❤️❤️❤️ ပြည်သူတွေကို နွေးထွေးစေတဲ့ ခေါင်းဆောင်၊ မျက်နှာ မငယ်ရစေတဲ့ ခေါင်းဆောင် အမေစု ကျန်းမာပါစေ။ ပြည်သူတွေလည်း နေ့စဉ်နဲ့အမျှ ကြုံနေရတဲ့ ဘေးဒုက္ခပေါင်းစုံကနေ အမြန်ကင်းလွတ်ကြရပါစေ။ Crd — TikTok de @nld052