ထိုင်းပင်လယ်ပြင် လှေနစ်မှု၊ ပျောက်ဆုံးမြန်မာရေလုပ်သား ၆ ဦးလုံး လှေပျက်အတွင်းကအခန်းထဲမှာ သေဆုံးလျက်တွေ့ရှိ အောက်တိုဘာ ၊ ၂ ရက် The Justice Wave ထိုင်းနိုင်ငံ ချွန်ဘူရီခရိုင် စက်သဟစ်ကမ်းလွန်တွင် နစ်မြုပ်ခဲ့သော ငါးဖမ်းလှေကို ကမ်းဘက်သို့ ပြန်လည်ဆွဲယူနိုင်ခဲ့ပြီးနောက် လှေအတွင်း ပိတ်မိနေသည့် မြန်မာရေလုပ်သား ၆ ဦးလုံးကို သေဆုံးလျက် တွေ့ရှိခဲ့သည်။ “S. Kanchana Waree 888” အမည်ရှိ အဆိုပါငါးဖမ်းလှေသည် စက်တင်ဘာ ၂၁ ရက် ည ၁၀ နာရီဝန်းကျင်က လှိုင်းလေပြင်းထန်နေစဉ် စက်သဟစ်မြို့နယ်၊ ဆဲမဆန်ကမ်းလွန်ပင်လယ်ပြင်တွင် နစ်မြုပ်ခဲ့ခြင်းဖြစ်သည်။ လှေပေါ်တွင် ထိုင်းနိုင်ငံသား ၂ ဦးနှင့် မြန်မာနိုင်ငံသား ၂၀ ဦး စုစုပေါင်း ၂၂ ဦး လိုက်ပါလာခဲ့ကြသည်။ လှေနစ်ပြီးနောက် ၁၅ ဦး အသက်ရှင်လွတ်မြောက်ခဲ့သော်လည်း ထိုင်းလှေမှူးတစ်ဦး သေဆုံးခဲ့ပြီး မြန်မာရေလုပ်သား ၆ ဦးမှာ ပျောက်ဆုံးနေခဲ့သည်။ ပျောက်ဆုံးနေသူများ လှေအတွင်း ပိတ်မိနေနိုင်သည်ဟု ယူဆကာ ရေငုပ်သမားများနှင့် ကယ်ဆယ်ရေးအဖွဲ့များက ရှာဖွေခဲ့ကြသော်လည်း ပင်လယ်ပြင်အခြေအနေ ဆိုးရွားမှုကြောင့် လှေအတွင်းသို့ ဝင်ရောက်ရှာဖွေရေးမှာ အခက်အခဲများရှိခဲ့သည်။ စက်တင်ဘာ ၃၀ ရက်တွင် လှေပျက်ကို ရေပေါ်ပြန်တင်ကာ ငါးဖမ်းလှေ ၃ စီးဖြင့် စက်သဟစ်ရှိ Juk Samet ဆိပ်ကမ်းဘက်သို့ ဆွဲယူလာနိုင်ခဲ့သည်။ ထို့နောက် လှေအတွင်း ပြန်လည်ရှာဖွေရာ ကျဉ်းမြောင်းသည့် အခန်းနေရာများအတွင်း ပိတ်မိနေသော ရုပ်အလောင်းများကို တစ်လောင်းပြီးတစ်လောင်း တွေ့ရှိခဲ့ပြီး နောက်ဆုံးတွင် ပျောက်ဆုံးနေသူ ၆ ဦးလုံးဖြစ်ကြောင်း အတည်ပြုနိုင်ခဲ့သည်။ ထိုင်းသတင်းများတွင် ဖော်ပြထားသည့် အချက်အလက်များအရ သေဆုံးသူများမှာ Soe Lat၊ San Htike၊ Naing Oo၊ Htun Lwin၊ Khin Maung Aye နှင့် Yi Lin တို့ဖြစ်ကြသည်။ ရုပ်အလောင်းများကို မှုခင်းဆေးပညာစစ်ဆေးမှုနှင့် မည်သူမည်ဝါဖြစ်ကြောင်း အတည်ပြုနိုင်ရန် စက်သဟစ်ရှိ ဆေးရုံသို့ ပို့ဆောင်ထားသည်။ လှေပျက်ကို ကမ်းဘက်သို့ ပြန်လည်ဆွဲယူချိန်တွင် ပျောက်ဆုံးနေသူများ၏ မိသားစုဝင်များလည်း ဆိပ်ကမ်းတွင် စောင့်ဆိုင်းနေခဲ့ကြပြီး ရုပ်အလောင်းများ တွေ့ရှိပြီးနောက် ဘာသာရေးထုံးတမ်းအရ ဝိညာဉ်ပင့်ဆောင်သည့် အစီအစဉ်များ ပြုလုပ်ခဲ့ကြသည်။ ယခုဖြစ်စဉ်ကြောင့် “S. Kanchana Waree 888” လှေပေါ် လိုက်ပါလာသူ ၂၂ ဦးအနက် ၁၅ ဦး အသက်ရှင်လွတ်မြောက်ခဲ့ပြီး မြန်မာရေလုပ်သား ၆ ဦးနှင့် ထိုင်းလှေမှူး ၁ ဦး စုစုပေါင်း ၇ ဦး သေဆုံးခဲ့သည်။ #thejusticewave #MyanmarWorkers #thailand #MyanmarMigrantWorkers — @the.justice.wave TikTok